عمري 15 عام :
كنت نقرى في المعهد الفني بنابل. نهار سبت كما اليوم!!
ندخل التسعة! طمبك الجو والمراهقة وماشي نقرى مكركر من خشمي خاطر نهارتها الطقس حلو برشا وحبيت نهبط Le voilier 470 الي كنت نسرح به في البحر !! وقتها برشا هملة ورياضة وبحر العام علاش يدور …الخ ! (الزمن الجميل بالرسمي )
مانعرفش علاش نهارتها وقتلي فقت الصباح ماحليتش الراديو يمكن لأن السبت مافماش حصة يوم سعيد الي كانوا يداولوا عليها نجيب الخطاب والبشير رجب وصالح جغام!
المهم خرجت من الدار ومشبت مسافة معينة لين وصلت قدام مغازة Le Passage الي اصبحت اليوم Monoprix نابل بجنب مقر الولاية في شارع الحبيب بورڨيبة.
وقتها وين يعرضوني التلامذة الي ماشين لليسي الي يسكنوا في حي نيابوليس وال AFH 1 .
نسمع فيهم يحكيوا واحد يقلو : ” يا ولدي لا راهو بورڨيبة مزال يحكم” ولاخر يرد عليه “يا ولدي سايي بورڨيبة تنحى والوزير الاول بن علي هو الي يحكم تو” !!
انا بهت في الحديث؟؟ ياخي قلتلهم اش فما؟ عاودولي نفس الحكاية وصوتهم عالي شكون يقنعني أكثر!! ههههههههه
وقتلي وصلنا لليسي على مسافة 200 متر الناس الكل تحكي في الموضوع! طبعا داخل الدرس الاساتذة الكل تناولوا الموضوع !! لكن نتفكر وقتها الاستاذ تناول معانا الموضوع بحذر وكأنه كان في حالة انكار من الخبر!! حاجا تشبه شويا ل 14 جانفي وقتلي في الليل وحتى من غدوة فما اخبار تقول الي بن علي مشى للعمرة وراجع !! يعني الساعات الأولى فيها برشا انكار وبرشا تأويلات وتخبط وحذر !!
نفتح قوس: في صيف 1987 كان عنا صديق للعائلة يجي يتخلع في نابل (ماو نابل بلاد خلاعة وقتها) المرحوم الحبيب بسباس الله يرحمه عاد سي الحبيب كان PDG لاحدى الشركات العمومية يعني على الأقل نجموا نقولوا ساقيه في الركاب وكان يعرف بخبايا دوائر القرار! عاد في احدى السهارات الصيفية الهادئة وفي نقاش سياسي اجتماعي اقتصادي قال يا جماعة عندي ليكم خبر!! قال راهو les États Unis ont lâché Bourguiba وقتها انا مانيش فاهم برشا المقصود !! لكن وقتلي تأكد الخبر يوم 7 نوفمبر تفكرت ديراكت كلامه!!
مانعرفش اذا الوالدة Mariem تتفكر الكلام هذا!؟في نفس السياق أواخر ديسمبر 2010 فما انترفيو لوزيرة الخارجية الامريكية وقتها هيلاري كلنتن على احدى القنوات العربية سألوها ماهو تعليقها حول الأحداث في تونس فاجابت وان امريكا لم تعد على اتصال بالحكومة التونسية الي تدعوها الى ضبط النفس وعدم قمع التحركات السلمية !!
وقتها كيف كيف استحضرت كلام المرحوم سي الحبيب بسباس وقلت سايي بن علي a été lâché وكنت اتوقع انتهاء حكمه!! لكن يبقى الشك قائم!! اغلق القوس!!
كملنا الدرس وخرجت نلقى صديق ليا قديم اسمه سمير خوجة مغروم حتى هو برياضة الأشرعة قتلو ايا اخلط عليا للدار نحضرو ال 470 (تقرأ par abus de langage KAt Soixante-dix) نعملوا سرحه في البحر لين يخلطوا علينا مهدي Mehdi و سامي.
كان الأمر هكاكا! نحن مازلنا مابعدناش على الشط ونسمعوا في رياض Riadh يعيطلنا !! ارجعو ارجعو نطلع معاكم! نهارتها سي رياض كان في بالي مسافر للمغرب عامتها خذا الباك واعطاووه ISG ماحبهاش لانه يحب يطلع طبيب قام دبر ترسيم في كلية الطب بالرباط عاد موعد السفر متاعو نهارتها تزامن مع غلق المطار و غلق المجال الجوي! هههههه
رجع يجري يكمل في الجو في البحر!!
هذي ذكرياتي بيوم السبت 7 نوفمبر 1987! نهار مايتنساش!!
وتلك الأيام نداولها بين الناس كما جاء في الذكر الحكيم وكما قال ابو البقاء الرندي :
هِيَ الأُمُورُ كَمَا شَاهَدْتَهَا دُوَلٌ … مَنْ سَرَّهُ زَمَنٌ سَاءَتْهُ أَزْمَانُ”
أقرأ التالي
2026-01-21
مركب بلا ربّان
2026-01-15
الولايات المتحدة الأمريكية وإيران
2026-01-22
في هرم الدّولة والسّلطان، وشيخوخة النّظام قبل الأوان
2026-01-18
لا أحد انتبه للمعجزة في بكفيّا، مَن بعدُ يهمّه!
2026-02-19
محمّد بوغلاّب: عام، ملّي خرجت م الحبس الصغير لحبس أكبر
