ادلى ياسين الشيخاوي المشرف السابق على مركز تكوين الشبان بحوار لموقع “فوت24” وهي من المرات النادرة التي تحدث فيها الشيخاوي
وصرح ” احنا جينا باش نكونو حل ، كي حسينا انو وجودنا باش يولي يسبب مشكل، انسحبنا انا ويوسف بشر ومحمد الاديب”
وقال الشيخاوي” ساظل محبا وداعما لجمعيتي مدى الحياة” واثنى على الداعمين لمركز تكوين الشبان وخص بالذكر السيدة زهرة ادريس التي تدعم النجم منذ زمن طويل اضافة الى عدة اشخاص خيروا عدم الكشف عن هوياتهم
وشكر الشيخاوي محمد الاديب ويوسف بشر المسؤولان على مركز تكوين الشبان وهما ايضا تقدما باستقالتهما -بعد الظهور الاخير لرئيس الهيئة التسييرية كريم العكروت”- زوز رجال عرفتهم من احسن ما عرفت، والي عملوه حاجة تتقرى
وذكر الشيخاوي بانه جاء للمركز بطلب من عثمان جنيح، ّلقينا برشة حاجات باهية، ولكن على المستوى الرياضي كان لازم نصلحو برشة حاجات”
لقيت برشة مشاكل، ثمة ملاعبية نما تستحقش تكون في ليتوال، حلينا باب الاختبارات،
للناس الكل لان النجم ليس جمعية سوسة فقط او الساحل دون بقية الجهات ثم توخينا الاختبارات الموجهة
ونقصنا عدد الملاعبية، ما تنجمش تخدم بمجموعة فيها 40 لاعب، توة نخدمو بمجموعات لا تتجاوز 25 وفخور انا جهزنا قاعة تقوية العضلات بكلفة 300 الف دينار ، مثمنا دور محب رفض الافصاح عن هويته
وكشف ياسين الشيخاوي ان ادارة المركز كانت تتكفل بكل شيء من تجهيزات واجور ونقل واعاشة ومدربين ومختصين في العلاج الطبيعي…. بميزانية تناهز مليار و200 الف دينار ، اما مداخيل الاكاديمية فتبلغ 700 الف دينار، وقد تحملنا مسؤوليتنا لتوفير الفارق، وهو ليس هينا 500 مليون كل عام، تحملنا مسؤولياتنا ووفرناها ونظن انا ما قصرناش وخدمنا خدمة باهية ، وخلصنا الناس الكل الي يخدمو في المركز
وقال في العامين الفارطين هزينا 3 القاب على 6ممكنة في الشبان وهذا مؤشر على اننا نسير في الطريق الصحيح
وقال الشيخاوي، يمكن عيبنا انا ما نحكيوش، احنا جينا لليتوال باش نخدمو ونعطيوها وموش مزية من غير ما نتكلمو ولكن يبدو انو يلزمك تتكلم على كل حاجة تعملها
وطلب ياسين الشيخاوي من الجمهور الصبر على اللاعبين الشبان مثلما حدث معه ، قال” احتجت عاما او عاما ونصف حتى اتمكن من التعبير عن نفسي لان”مريول ليتوال رزين”
في البداية تخبيت وراء زبير بية، توة الظروف تبدلت ولينا طالبين من ملاعبي صغير يهز الجمعية على اكتافو ”
واستشهد الشيخاوي بتطور مردود ريان عنان
واضاف ياسين الشيخاوي، ما نرد على حد لكن برشة كلام غالط تقال في حقي، وفال ان شاكر الزواغي مدرب النخبة لاهو قريبي ولاهو نسيبي، هو صاحبي وعشيري ولو جيت نخدم في اصحابي راني خدمت شاكر الزواغي م العام الاول الي جيت فيه
وقال لا شيء يمنع من وجود انسان خدام ونظيف في ليتوال
ورفض الشيخاوي اي تمييز بين اللاعبين المحليين والمقيمين بالخارج، لكنه رفض الحكم المسبق بان اللاعبين القادمين من الخارج افضل من اللاعبين المحليين
ونوه بتطور مراكز تكوين الشبان في النوادي الكبرى ورد السبب الاصلي لتراجعها سابقا الى تدخل الاولياء الذين باتوا يهيمنون على مراكز تكوين الشبان وماعادش الملاعبي الباهي هو الي يلعب
الاصل ان الكورة للناس الكل، لا يهمني فيك غني او زوالي وما يهمنيش منين جاي الملاعبي وشكون بوك او امك
ولذلك كان ضروريا ابعاد هيمنة الاولياء على مراكز تكوين الشبان
اما عن زياد الجزيري فقال انه خط احمر بالنسبة اليه بسبب موقف رجولي خذاه معايا في المنتخب الوطني واني عمري 19 سنة، وانا الي اقترحت زياد كمدير رياضي وبالرغم مختلفين في برشة حاجات يقعد ديما كبير في عيني ومقتنع ينجم بعاون ليتوال برشة
واضاف عندي 25 سنة في الكرة، نعرف الجخود عادي ،تربيت عندي مشكل مع شخص نمشي نحكي معاه وجها لوجه، مانيش مستانس بالغدرة، وقفت مع رئيس الجمعية رغم ماكنتش راغب في مدير رياضي، نتحمل مسؤوليتي لكن الكيفية هي الي قلقتني، عمري ما طلبت منو شي ، انا وقفت معاه وقفة رجال وقت ما وقف معاه حتى حد، اخطر حاجة انو استعمل صفحة ليتوال لتصفية حساب شخصي، صارت حاجة بيني وبينو، نتحفظ عليها، كان ينجم يناديلي لبيروه ويحكي معايا كيما حكيت انا معاه اما تستعمل منبر ليتوال باش تتغرض م الناس، المرة الي فاتت تغرض في الناس الي خدمت قبلو والمرة هاذي تغرض في ياسين الشيخاوي
انا من اول نهار قتلو مدير رياضي ماهيش طموحي اصلا، قبلت ناقف معاه لاعداد الموسم وبعد نرجع لمركز تكوين الشبان
كريم العكروت ضربت عليه بالبونية ، نعترف اني موجوع برشة ملي عملو، اني حكيت معاه في بيرو مسكر، اما تطلع تحطني وجها لوجه مع الجمهور ، موش من حقك وظلم لي
احنا تفاهمنا على مشروع لاصلاح النادي وليس الفريق فقط، كان هدفنا تحقيق التوازن المالي للقطع مع دوامة الديون هذه السنة بشكل نهائي
كنت نحبذ كريم يخرج يقول الكلام هذا للجمهور ويصارحو ان النجم لن تراهن على القاب هذا العام، هذا ممر اجباري، مستحيل باش تصلح في 6شهور اللهم عندك برشة فلوس وهذا غير متوفر حاليا
انا ما نحكيش علي عملتو لكن الناس الي تخدم معاهم ما تعطيكش حقك، من قبل لا يجي كريم كنت مع سي عثمان ندورو باش نلقاو حلول لديون ليتوال
ديون الشيخاوي لدى ليتوال
انا نحب فلوس من ليتوال من 2020 من وقت سي رضا شرف الدين ربي يفرج عليه وما طالبتش بيها نهار ولم تشكل يوما مشكلا لجمعيتي، لكنها فلوسي تعبت عليها ، ما قلتش اني سامحت في 400 مليون لجمعيتي
لا خرجت قلتها لا حكيت، تنازلت على فلوسي رغم ما عندي حتى مصلحة لا ماشي لجمعية اخرى لا غيرها
واشاد بصدام بن عزيزة وامين بن عمر اللذين تنازلا عن جانب من مستحقاتهما لدى النجم ، في وقت ملاعبية نرى في صفحات تشكر فيهم وهوما ما تنازلوش على دينار لليتوال
اما عن اختيار المدرب فقال انه كان يفضل انيس بوجلبان ولكن لم يتسن ذلك بسبب ارتباطه بالمنتخب
اما محمد الكوكي فاقترحه كريم العكروت ولم نتفق لمطالب مالية مجحفة ثم جاء اقتراح براكوني من كريم العكروت وقبلته المجموعة
اما عن انتدابات اللاعبين فقال ان الجمعية لم يكن بامكانها انتداب لاعبين بمبالغ مرتفعة وتوخيت تمشيا واضحا ان اقترح والمدرب هو صاحب القرار ولا اتهرب من المسؤولية وانا عندي ثقة في المجموعة الحالية وخاصة بقدوم زياد الجزيري
ومنذ شهر ونصف اعطيت رايي الفني لرئيس الجمعية ثمة حاجة يلزم تتبدل ورفض الكشف عما يجب تغييره فنيا في النجم
وقال ياسين الشيخاوي جيت لليتوال عمري 13 سنة تربيت على قيم كبيرة مع سي اسماعيل العيوني وسي عزالدين دويك الله يرحمو وسي عثمان جنيح الي غير تاريخ ليتوال
وعن زبير بية قال زبير خويا الكبير، والي يجي توة يسير ليتوال يرحم والديه لان نسبة نجاحه ضعيفة برشة ، وزبير قدم صدرو وقت الناس الكل وخرت وتحمل المسؤولية
