آرام زياد الهاني:هذه ظروف حبس أبي

اليوم زرنا بابا.. سخانة تقتل والناس الكل تراها متعذبة نساء كبار رجال كبار يتحركوا بالصيف هازّين كان همّ العذاب الي متعذبينو ولادهم في الحبس..

المرابيط الكل عندهم الحق يخرجوا مرتين في النهار للآريا- الفسحة-  بش يتنفسوا مرة في الصباح ومرة في العشية واليوم تصدمنا الي بابا من الي دخل للحبس عندو الحق يخرج كان مرة وحدة في غرغور القايلة مع نصف النهار/ ماضي ساعة

تخيلوا نتوما حتى بش تتنفس يخرجوك كان بش تزيد تتخنق دونك بابا عندو جمعتين ما خرجش للآريا على خاطر ما ينجمش يخرج في القايلة، جمعتين بين أربعة حيوط … وعلاه المرابيط الكل عندهم الحق في مرتين الا هو مرة وفي غرغور القايلة ؟

بش يشريو ماء يشربوه عنده الحق في زوز ستيكات ماء كهو في الجمعة ما ينجمش ياخو أكثر. معاه مربوط ما عندوش شكون يصبلو فلوس (بش تقضي في الحبس لازم عايلتك البرة يصبولك في البوسطة فلوس تصرفهم وسط الحبس)

زميله في السجن يشربو وياكلو مع بعضهم وبما أنه السجين ما عندوش الحق في أكثر من زوز ستيكات في الجمعة بابا جابلنا اسم ونومرو السيد الي معاه بش نصبولو فلوس بش ينجمو ياخذو كمية متع ماء تكفيهم الزوز

كيف جاء بش يمدلنا النومرو قالولنا لا ممنوع… شنية القانون الي يمنع اننا نصبّوا فلوس لإنسان ما عندوش عايلة تنجم تصبلو فلوس ؟

معناها حتى تضامن المساجين بين بعضهم في السجن ممنوع ؟ عباد محصورين مع بعضهم 24/24 بين أربعة حيوط يوليو كيف العايلة ما عندهمش الحق يعاونوا بعضهم ؟ وزيد علاه الماء عندهم الحق في 12 دبوزة في الجمعة كهو الي هي ما تجيش قد 3 ليترات في النهار الي يوصيو بيهم الطبة خاصة في السخانة هذه ؟ الماء متع السبالة في الحبس ما يتشربش هو بابا عملّو مشاكل في جلدته خلّي يكمل يشربو ؟

فوق من هذا واحد كيما بابا وقته في الحبس يعديه يقرى طرف كتب قداه من ساعة بين أربعة حيوط لا تنجم ترقد لا تعمل شي من السخانة واصلا ما عندهم حتى نشاط للمساجين يكملوا النشاط الوحيد الي هو الكتب يزيدوا يتحرموا منه المكتبة مسكرة وبش تدخل كتاب للحبس تاخو اسابيع كان موش أشهر…

شنية هذا الكل ؟ علاه تمنع على الناس أنها تعاون بعضها في المحنة ؟ علاه تحرم الناس من الماء ؟ شمعناها تحرم الناس من طرف هواء ؟ علاه حتى النشاط الوحيد الي هو قراية الكتب يزيدوا يتحرموا منه ؟

فقط للتذكير الي القانون واضح في نا يخص الخروج للآريا:

القانون عدد 52 لسنة 2001 ينص في الفصل 19 على أن للسجين حق الخروج للفسحة اليومية لمدة لا تقل عن ساعة. وهذا حق قانوني، وليس مجرد امتياز إداري.
والأهم: الأمر عدد 1876 لسنة 1988 المتعلق بالنظام الخاص بالسجون ينص في فصله 38 على أن السجين يخرج مرتين إلى الفسحة، صباحًا ومساءً، كل يوم، وأن مدة الفسحة يضبطها مدير السجن مع مراعاة ظروف كل سجين